HISTORY OF THE HOLY BIBLE IN SOURA

BAIBOLAN APSELE ASUI BIRNANJI

BAIBOLAN ITIN:

BAIBOLAN a sakkai garamgaman "Kambol". Kani Ordar lingan "Baibolan" na kara piming. Baibolan dam bo "Sastro" gamle galam, itin asan gamlenden, Sastro a garamgaman "Anidolan a delin ati na". Baibolan 66 kambolanji a ganuntin na. Bar kan ati satta kaija kambolanji a ganuntin tid, Bindo Kitungan anappai anidol kambolanji a ganunti- Kitungan a birnan. Kan ati mangling len Kitungan a Birnan na. Anin a birnanji sanle Kitungan anin a ir-ahid ranaptin, a ganugun bar anin a kuddub rubmang lanumanji appunggite.

BAIBOLAN ANIDOLAN:

mojes batti anidolan adelin Aparmangtan Kambolan Sring susule Jon batti anidolan adelin Baibolan a takud Anappungi Kambolan Sikoija, Delinden 1500 mihum a tarangdi bigarda bigarda ayam lingan anidolan deli. Kan ati bigarda bigarda idol-maranji 1500 mihum lingan bigarda bigarda ayam bar bigarda bigarda darakuna linganji anidolan deli janang den kuddub Kambol linganji ayinganti sannarin gijtati, kuninna ati Baibolan a murda biran bar kuddub sring rubmang dagi abirna. Kuni sring sakkin daku do, Baibolan Kitungan a birnan na bar okij Kan ati Kitungan sring na bar anabhanan dean dele Idol-maranji a idlenji batti kan atti sakkai do dirnabin tungna.

PAPUR ANOSOI:

Baibol lingan bagu panallangan daku, PAPUR ANOSOI do TABME ANOSOI. Papur Anosoi lingan 39 kambolanji daku. Bar kan ati Jiudinji do Kristu maranji jaleji. Papur Anosoi lingan, Ganardin a birnanji sring susule Kitungan asneda jattin a purba biranji anidolan daku. Kitungan Mandran a pintun sring arab-rab-bin a Tangoran Papur Anosoi lingan Kitungan a punggite do Tungmadgij maranji sanle Ordaran a tanandi-mar Mesian a dayarnan gadlamte.

TABME ANOSOI:

27 kambolanji sanle Tabme Anosoijan deli. Jisu Kristun(Mesian) a dayarnan, A mandrengnan, a tiydamnan karahidan, a yanarmengan do a kubdamnan batti anin yan-gamle d'ong len a pintun sring tandite, Kan a kuddub birnanji tidne anidolan daku. Bar Aparmangta Kristu Ranukkun janang, Tabme Anosoi lingan anidolan deli.

BAIBOLAN Y'AN GAMLE HANGLABI:

Baibolan ababmang sastrinji a s'i damanji batti anidolan ddeli. Aninji tamparub satta Baibolan idle dakulinji, antin asan asui madra kun Baibolan a hangleji. Baibolan abab-mang ebri do aramik lang-langan batti anidolan deli. Jisu Kristun a karudkud-dan 150 mihum a purban kan ati Grik lang-lang lingan janang banandan deli.

Bindo Tabme Anosoi lingan a kuddub kambolanji Grik lang-lang lingan anidolan deli. Jisu Kristun a karahidan 350 mihum atiki, Adiyo Ranukkun bo bigarda danegod maran Jerum, Baibolan a d'ong Lattin lang-lang lingan banda-etin. Kun ayam lingan lattin lang-langan kuddub maneng, kuddub manran amang lingan hanandram deli. Dajing ayam a tiki lattin lang-langan a hanandraman dirga-dirga asuijli. Deli-janang den Jerum batti anidolan adelin lattin Baibolan "bolget" gamle arabmaddan daku, Yurupa barubyung-seng lingan 1000 mihun sring aur sikkoija hanandraman deli.

1300 mihuman a tanakud-Lingan Jon Eiuclip gamle bo Kitungan a boantan, Kuddub jattinji do kuddub mandranji yanti gamle di-dargam lang-langa lingan Baibolan kinolle raptiteji, Kuni a sanengsengan pangle English lang-lang lingan Baibolan banda-etin. Kun ayam lingan parampam misinan adakulin asan anidol-s'in Baibolan asuimandra amang satta ahangbin deli. Kan sring 140 mihum atiki William Tindel gamle bo bigarda-mar Tabme Anosoi a d'ong Grik lang-langan sring English lingan banda-etin. Kunina ati Tabme Anosoijan Aparmangta anappaman deli.

Kan sring 1611 sallon adnang Jems Rajan abanaihan batti English Bible bar-okij banandan dean dele nami sikkoija ( King James Authorised Version) gamle daku.